某星期六既下雨天，約了朋友係中環Espuma食Tea，由IFC那邊巴士站行到威靈頓街，我真係罵自己一百次點解唔搭地鐵或者穿地鐵站行過去？因為果15分鐘既路程，又焗又濕，真係會令人崩潰，一到餐廳，如進入天堂，馬上降溫。
星期六既下午，餐廳不算多人，環境舒服。
Window seat的風景好開揚啊，心情頓時變好。
本來只打算各至叫份Tea食，但侍應介紹佢地岩岩出左個Afternoon tea set，見個樣都幾靚仔，朋友又有興趣，咁一於試下啦。平時好少食High Tea，一來我唔算太好甜品，二來覺得好多酒店High tea既食物都係整定哂，有d擺得耐，雪到又硬又乾，但收你四，五百蚊，咁我覺得有其他更好既選擇囉。
呢度既High tea set只係$228 for two，仲包兩杯野飲，中環黎講，除開每人只係一百鬆d，飲杯咖啡食件Cake都差唔多啦，絕對值得一試。
傾左陣計，Tea set就黎啦，用上餐廳既Initial "e"字做透明層架又幾特別，總共有三層，份量都唔會太少，食物同餐牌上既相一致，至於味道又如何呢？ 馬上試試。
先試Scone，提子乾Scone暖暖地，都幾鬆化同有牛油香，配上果醬或忌廉一齊食就無咁Dry，Size的骰，唔會食完太飽滯，合格！
之後再由第一層開始食，忌廉紅莓朱古力脆餅 - 我本身好鐘意食Raspberry，再配埋忌廉同朱古力脆餅，酸酸甜甜，又有朱古力香，好味。 隔離既就係紫薯puff - 忌廉puff就食得多，呢個以紫薯蓉做餡，好特別，紫薯蓉好幼滑加埋有杏仁片既puff，味道唔會好甜，唔錯！
第二層係咸點，野菌酥盒 - 酥皮盒好鬆化，野菌加芝士好香濃。鮮果蛋沙律 - 我本身以為就咁得d雜果粒，原來下面係蛋沙律，蛋沙律又係我最愛，加埋雜果粒中和下無咁漏，更加好味。
話咁快就到最底一層，由後面開始食。煙三文魚脆多士 - 三文魚插住一塊細檸檬，令魚肉有陣陣檸檬香，無腥味，幾油潤，底有脆多士片，方便用手拎住食。雞尾酒蝦沙律 - 蝦肉都幾爽口，配上酸酸甜甜既cocktail sauce，好開胃。歌劇院蛋糕 - 朱古力香濃，唔會死甜。綠茶布丁 - 淡淡綠茶味同奶香，布丁好軟滑，幾好。 果仁金寶咖啡蛋糕 - 咖啡味蛋糕加上果仁碎，味道好夾，而且果仁粒，增加香味同口感。最後係顏色好少女既仙人掌忌廉撻 - 粉紅色好可愛加上mini棉花糖粒，配埋曲奇餅皮，唔會好甜，同幾香牛油味。
最後order埋兩杯野飲，個杯墊幾靚。
朋友叫既Cappuccino，有靚靚拉花，佢話咖啡好香，好順滑。
而我就叫左杯西柚冰茶，估唔到有咁大舊西柚係入面，好香西柚味，好refresh。
Tea Set整體既野食都幾好味，而且蛋糕無雪到硬哂乾哂既問題，咸甜點比例平均，每樣各有兩件，唔洗爭，做到bite size，食完都唔會太飽太Heavy。咁舒服既環境加埋美景同呢個顏色七彩既Tea set，簡直就係雨中既彩虹，其實落雨又有咩好怕wor！？haha...
地址:中環威靈頓街2-8號威靈頓廣場M88 17樓
電話: 2973 6088
營業時間: 星期一至日: 11:30-23:00
沒有留言:
張貼留言