好吃燴意-奇香冰室

許志安有首歌唱「流淚行勝利道‧‧‧」，我就唔係好明點解行勝利道要流淚啦？ 因為短短一條勝利道有好多寵物店，睇下d貓仔狗仔都幾開心ga wor，仲要幾多野食tim，而當中仲有一間老字號冰室-奇香冰室，已經有40幾年歷史ga la！之前同Mr.No都黎過勝利道食野，不過就係食呀坤哥比人X果間海南雞飯，今次出開旺角就黎奇香食返個Tea，順便試下佢地既燴意粉係咪真係咁正先？

冰室不大，一個水吧，5張卡位加幾張細枱。只有一位年青人做樓面，可能食物種類唔多，見佢落單都唔洗寫低，直接叫入水吧，水吧裡面果位姐姐就會一路收order一路準備食物/飲品。

Mr.No叫既奶油多$9加凍奶茶$14，一睇個奶油多就知有水準，多士兩邊都烘到香脆，搽滿花生醬同練奶，簡單滿足。奶茶就一貫茶記水準~

雞絲燴意$33，除左雞絲，亦有鮮蕃茄同青豆做配料，雞絲係雞柳，唔鞋無雪味，意粉唔會好似一般茶記煮得太淋，略為煙韌彈牙，難得！茄汁不多不少剛好包住每條意粉，乾身唔油膩，茄汁甜酸平均，真係好好食~讚！

另叫了一杯熱朱古力$13，朱古力唔係甜死人果種，有少少黑朱古力既苦味，喜歡！

簡單食物用心煮亦能令人留下心刻印象，除左食，亦係好多舊街坊，老熟客的聚腳點，能令老冰室迄立不倒40幾年大概就係呢d原因，本土味道，小店人情味，在寸金呎土的香港買少見少，要好好珍惜！

Address: 何文田勝利道26號B
Tel: 2713 3209

可以更好- 井橋日本料理

時間過得真快，不知不覺同Mr.No就一齊九年半啦，放工之後搵個地方食飯慶祝下，行行下就行左入山林道，諗一諗我地從來未係山林道既餐廳食過飯，想食日本野，見呢間食評幾好，又有刺身併盤優惠，咁一於試下啦!

餐廳地方唔大，只有5-6張4人枱同埋一間坐到12人既房，裝修普普通通但尚算乾淨企理。




坐低侍應好快奉上餐牌同茶，可惜茶唔夠熱，曾經聽人講過一間日本餐廳好唔好，從最細微既一杯餐茶可以睇到，咁即管睇下呢句說話係岩定錯~ 睇一睇餐牌，發現優惠轉左，之前係消費夠$300就可以半價食刺身併盤，而家已經變左半價食宮崎A4和牛西冷，由於遲d會去九州旅行，都打算食宮崎牛，當地食一定比呢度食好啦，所以就無叫到啦~

呢度既食物種類都有好多，刺身、壽司、串燒、燒、炸物、煮物、定食同拉麵都有。因為入黎之前係一心想食個刺身併盤(上級)$328，所以就算無左半價，我地都叫左，個併盤以$328黎講都算好多款刺身(有三文魚，油甘魚，劍魚腩，珍寶帆立貝，甜蝦，左口魚裙邊，吞拿魚，海膽各兩件) 油甘魚，左口魚裙邊，劍魚腩，吞拿魚呢幾款質素比較一般，唔算太新鮮，無咩魚味。珍寶帆立貝同海膽就好鮮甜，同埋三文魚係厚切，好滿足!




胡麻汁蕃茄豆腐沙律($58)，份量都幾大，好多片蕃茄，豆腐同蟹籽，呢度既胡麻汁係另用碗跟上，而且好大碗，可以令所有材料都沾滿汁，胡麻汁夠香濃，簡單既材料都變得好食~

牛油果軟殼蟹卷($88)，我同Mr.No都好鐘意食牛油果，呢度既牛油果比得唔孤寒，加上大量蟹籽籽同沙律醬，配埋香脆既軟殼蟹，實在唔會有唔好食既理由~

燒多春魚($58)，BBQ最愛食物之一，可惜呢度燒得過左火，魚尾都燒燶哂，比較乾身，又無乜鹽調味，覺得自己BBQ燒得比佢好食好多!

燒羊架($38)，羊扒都幾淋身，多肉汁，仲可惜毫無羊味，似食緊豬扒!

饅魚炒飯($128)其實食到呢度都九成飽，所以見到呢個飯時真係有D滯，但都唔可以浪費食物食埋佢，炒飯較濕，唔夠爽身，加上有好多饅魚，咁多饅魚其實都幾漏，所以真係滯上加滯，建議加多D蔬菜粒增加清爽感。

總結係一間不過不失既日本餐廳，食物份量雖大，但質素好懷參半，有改善空間，埋單七百多，以此價位，同區可有其他更好選擇! 果然一杯茶可以睇得出一間餐廳食物質素亦不是沒道理，正所謂觀微知著，咁以後去其他日本餐廳食飯，而茶唔夠熱，係咪唔好叫咁多野食，留肚食第二間呢? 哈哈

Address:尖沙咀山林道21號地下
Tel: 2314 9190
Open hour:
星期一至六: 11:00-14:15; 18:00-23:00
星期日: 11:00-14:15; 18:00-22:00

工廈懷舊風 - 伙食工業 Fooody

上文介紹完傢俱咖啡店，飲完咖啡後轉場到Mr.No介紹既伙食工業 Fooody，由於佢之前係火炭返過工，話呢度d野幾好食，咁就跟佢去試試啦！今次呢間餐廳係地舖，唔洗上樓，一推門入去，地方都幾大，昏暗既燈光，好Retro既裝修，所有枱櫈款式都唔統一，四圍又有好多懷舊擺設，仿佛好似入左一間古董傢俱店。





當日正好有2016火炭春立音樂會，6:00pm後係餐廳舉行，雖然未夠鐘開始，但不同樂團已經係度進行rehearsal，結他，鼓聲，此起比落，雖然有少少嘈，不過都幾好feel！相信夜晚正式開始現場氣氛會更加正！

講完餐廳環境講下食物，呢度主打台式食物，好似滷水、台式牛肉麵、香酥雞、及台式飲品，亦都有少量西式食物，意粉，漢堡包，pizza等等‧‧‧我同Mr. No分別叫左炸魚薯條他他汁同埋台式滷肉飯配滷味併盤。



先黎係Mr.No既台式滷肉飯配滷味併盤$50，用藍邊鐵盤奉上貫徹呢度既懷舊風，滷肉飯用上珍珠米，配上半隻滷蛋同一片酸蘿蔔，一d都唔馬虎，滷肉唔會太咸，亦都無太多肥肉，唔錯！而滷肉併盤細細碟但好豐富，有豆腐、豬耳、雞翼同白蘿蔔，滷水好香，幾入味!


之後就係我既炸魚薯條他他汁$50，魚柳都幾大塊，魚肉結實，最怕食炸魚柳係皮肉分離，呢度無呢個問題，炸漿唔厚又唔油膩，點埋有大量酸瓜粒既Mayo食，真係好滋味! 粗薯條外脆內軟，無多餘油份，讚！

我地食下野影下相聽下歌，不知不覺就坐左兩個鐘，如果大家假期諗唔到去邊，除左去大商場行街睇戲，不妨都試下去工業區發掘一下，可能會係你黑板既生活中搵到久違既「驚喜」。

Address: 火炭坳背灣街57-59號利達工業中心地下3號舖 (正門入口-火炭路)
Tel: 3586 0863
Open hour:
星期一: 12:00-18:00
星期二至日: 12:00-22:30

品味傢俱x咖啡店-Out of cafe

又一個陰天濕凍落雨既星期日，最近既天氣真係令人無哂精神，星期六已經係屋企宅左成日，今日點都要出去行下既，不過落雨斯濕真係唔想去咁遠，又無咩mode行街，所以早一晚又係我既to eat list入面揀左呢度 - Out of cafe。Out of cafe係一間名叫Out of stock傢俱店旗下既cafe，所以大家嘆咖啡，食蛋糕之餘亦可以順便睇下呢度好有design同品味既傢俱！

去到工業大廈門口有佢地既易拉架，位於12樓，問下看更叔叔，佢叫我地行到最入既1號客lift搭去13樓行樓梯落一層，星期日工業大廈水靜河飛，行後樓梯時都有d驚(幻想有喪屍跑出黎，睇喪屍片太多！哈哈)


到達，型格十足既門口！


入到去又係另一種感覺，淺木地板同埋大量木製傢俱，感覺好warm好舒服，前半店擺放傢俱display，後面就係開放式咖啡吧，座位區同洗手間。



由於後面既座位區已經坐滿，於是店主安排我地坐係咖啡吧前既枱(本身係display黎ga)，然後就放低三份menu。


皮製既menu真係第一次見，好鬼有型！上面介紹既係佢地當日店內用黎Hand Drip既咖啡豆，分別有來自曼特寧、哥倫比亞、哥斯達黎加同埋埃塞俄比亞。不過由於我同Mr.No都係飲慣milk coffee，所以就無試到啦!

另一個小木牌上面就係大家平時飲慣既milk coffee/espresso/朱古力/茶，我同Mr. No分別order左比較少地方見到既Rose latte $45同埋Hazelnut latte $45。

除左飲品，佢地都有d輕食，吐司/Waffle/蛋糕等等‧‧‧不過我地果日諗住去另一間餐廳食野，所以就無叫野食啦!

等左一陣咖啡就到啦，兩杯都有好可愛既拉花，我杯Rose latte有朵微笑既花花之餘仲有塊玫瑰花瓣，而Mr.No果杯就係一個心形哈哈笑！:)



味道方面，我果杯一黎到已經聞到淡淡既玫瑰香味，咖啡味道好mild，無過苦或酸味，飲落夾雜少少花既香甜味，好岩我口味。後來我有問咖啡師係點樣沖呢杯Rose latte，原來佢地係落左玫瑰既serum，之前佢地試過將玫瑰花瓣同咖啡豆一齊磨，但效果麻麻，所以最後諗到呢個方法！而Mr.No果杯既Hazelnut味都好香，好nutty！飲到最後個拉花仲係度ga :)'

飲完咖啡，我地就四圍參選下，呢度d傢俬真係好靚呀，多數來自日本同北歐，價錢屬於中上，如果可以全屋都用哂呢度既傢俬就好啦(發夢中)。


除左傢俬，呢度仲有d有品味既雜貨同小物賣，有部份係黎至SVL Storerooms。

見到呢度有個mon，係用黎做咩ga? 原來呢度久唔久都會有開辦一d分享會/講座，大家可以留意佢地FB或者網站!

最後，係入面既座位區一排玻璃窗滲入自然光，而且仲有個page one既書架，客人可以隨便拎d書黎睇，咁正既環境，飲杯咖啡，睇下書，真係坐足大半日都唔想走呀！





總結呢度真係一間非常正既cafe，環境舒服，咖啡又好飲，有書睇有傢俬同埋雜貨小物賣，雖然位於工廈唔係咁就腳，但正正因為係工廈先可以有咁大既空間比店主做到一個咁多元化既空間，希望香港可以有更多呢d有性格同獨特性既地方，令消費者唔洗只局限係倒模式既連鎖集團。

Address: 火炭坳背灣街30-32號華耀工業大廈1215室
Tel: 2882 9116
Open hour: 星期一至日: 12:00-18:00

Out of stock: https://store.outofstock.com.hk/
Out of cafe: http://www.outofcafe.com.hk/