蝦兵蟹將，盡在喜記

有朋至遠方來，一盡地主之誼帶佢地四圍去之後，到左晚餐時間，佢地話想試下香港既避風塘炒蟹，咁我一搵之下，發現喜記係尖沙咀I-square開左分店，咁岩朋友又係住尖沙咀既酒店，咁實在太方便啦，唔洗專登過海。老實講，薑蔥炒蟹我就食得多，避風塘炒蟹其實係第一次食，所以我自己都幾期待。哈哈！

餐廳環境一貫中菜格局，地方不算太大，但坐得唔侷促。


火焰蜆(例) $118
先來一個火焰蜆，蜆用錫紙包裝住，再擺係舖滿石仔既煲仔上面，侍應就會點火，再加上花雕酒，酒一加，火焰升起又有酒香，真係色香味俱全，煮到蜆全開口就食得。蜆唔係大粒，但粒粒都有蜆肉，無沙，有酒香又鮮甜，唔錯。



桂花酒釀蟹 $360 
朋友係餐牌見到呢個菜話好特別，想試下，呢個煮法又真係未見過，大家一致讚成。平時桂花酒釀都係用黎煮糖水，用黎煮蟹會係點呢? 蟹本身好新鮮，蟹肉好鮮甜，再加埋酒釀既微甜同桂花既清香，估唔到係咁夾，幾有驚喜！個蟹鉗啖啖肉真係好正~


避風塘辣蟹(小辣) $480 
之後主角就上場，一擺低就蒜香撲鼻! 蟹上面舖滿厚厚既炸蒜粒，畢少少試下，又香又帶小小辣味， 而隻蟹都係好好肉地，蟹身同蟹鉗都好多肉，蟹走過油再同蒜粒一齊炒，蒜香味入哂蟹肉，非常惹味。朋友都大讚呢種食法真係好好味！

濃湯野菌浸時蔬 $78
食完濃味既避風塘辣蟹，就食返個清爽既蔬菜，濃湯都幾甜，有蕃茄，木耳，菜心，健康!

蟹油炒麵 $72
最後食個呢度每枱都叫既蟹油炒麵作結，炒麵炒得好乾身，唔會痴埋一堆，加埋蟹油既香辣，比普通既炒麵多一份惹味。

最後仲有蕃薯糖水送，正呀!

食蟹一定係落手落腳食最方便，餐廳都好細心整左個洗手盤比大家走之前洗洗手，加分! 朋友好滿意呢餐，話一定會推介比黎香港旅行既朋友食。

大埔誠意小店 - 炎天丼

某星期日又同Mr.No 係屋企Hea hea咁渡過，唔想煮飯，得知最近大埔開左間以天丼做主打既小店，一於渣車過去試下先。

小店位置係明星酒樓隔離，相當易搵，舖位細細，除吧台位只有幾張2人枱。由於我地6點幾就去到，所以都有好多位置選擇，揀左吧枱角落位置，可以一路食一路望入半開放廚房，睇住佢地炸天婦羅既過程。不過有樣想講，由於open kitchen，油煙味都有d重，希望抽氣系統可以有所改善。

望望Menu，簡單！只有3款天丼，海老，海膽及野菜，我同Mr.No分別叫左海老同海膽，套餐包沙律同麵豉湯。

係呢度食野係唔收加一，所以水同餐具自己搞掂，其實我覺得咁樣仲好，方便食客同waiter，有時去d餐廳，想話要杯水係會問到你燥，明明我要比服務費但完全得不到服務，咁倒不如自助仲開心！

海膽天丼 $78
一望個樣就相當豐富，即叫即炸，熱辣辣，海膽有2件，用紫菜包住炸，海膽份量都唔少，配菜有炸茄子，炸南瓜，炸蓮藕同埋好特別既炸菜心苗，而且仲有炸溏心蛋一隻。

海膽似係加拿大海膽，炸完暖暖地更加軟糯，味道鮮甜。

海老天丼 $55
張生叫既海老天丼，除了將海膽變成兩隻炸蝦，其他配菜基本上係一樣，海老雖然唔算好大隻，但肉質都幾爽彈，少少鮮甜味， $55黎講有咁大堆頭既天婦羅丼，其實都已經物超所值。

海老天婦羅 $8/隻
因為蝦既size唔算大，食兩隻唔夠喉，所以額外再追加兩隻。

食到最後，將炸溏心蛋篤穿，蛋黃撈勻珍珠米，再加上少少甜醬油同飯素，真係超好味，為呢餐畫上完美既句號!

上水日式料理 - 漁匠料理

作為一個北區人，講真上水粉嶺真係無咩好食，因上水已經淪為水貨城，藥房仲多過便利店，係無野好食之中，好彩都仲有一間開左頗耐既日本餐廳仍然屹立不倒。 平時多數黎食佢地既下午茶，今晚約埋細妹試下佢地既晚餐先。

巨峰梳打 同 柚子蜜梳打，入面有爆球增加口感，天氣熱飲返杯梳打真係爽~



係是日推介度叫左金目鯛刺身同日本室津生蠔，金目鯛既賣相好靚，一睇就知新鮮，魚肉微甜又有彈性，點埋佢旁邊酸酸地既醬汁又好開胃。 平時食澳洲，法國蠔就多，日本室津生蠔真係未試過，一於叫兩隻試下，質地都幾Creamy，不過海水味同蠔味就較淡，岩一d初嚐生蠔既朋友食。

凍蕃茄沙律，蕃茄多汁飽滿，加埋黑醋汁調味，好清新refresh!!!


我同細妹都好鐘意食軟殼蟹，所以一見到呢度有軟殼蟹天婦羅就話一定要叫。 原隻軟殼蟹炸到金黃色真係好吸引，炸得幾乾身，一d都唔油淋淋，好酥脆，軟殼蟹味好香濃，正！




備長炭燒海鮮併盤，有帶子，鮑魚仔，大蜆同蠔，即燒即食，四樣海鮮都好鮮甜，唔洗加任何調味料都好好味，可以一邊燒，一邊食，一邊傾下計，唔錯唔錯~

最後食埋甜品，溫室蜜瓜紅豆芭菲，一上枱真係嘩！一聲。係成半個日本蜜瓜，好夠份量，呃like一流，先食蜜瓜，好甜，再將紅豆同雪糕mix埋黎食，紅豆好大粒，食完真係大滿足。

將藝術加進食物 - ATUM Restaurant

要講尖沙咀我比較鐘意行既商場一定係K11，地點就腳，人流唔會太多，而且店舖比一般大商場較為有特色，有Select shop，有設計家品店，間唔中又有不同本地設計師既小攤檔，睇既野無咁悶，行得又舒服，而且呢度商場雖然唔算大，但餐廳都有唔少好選擇。

鐘意食甜品既朋友一定有留意ATUM，係銅鑼灣既餐廳專做甜品，而最近佢地仲開埋餐廳，選址就係K11，開係呢度真係好合佢地既風格。裝修以水泥色為主，天花有d樹枝裝飾非常有型格，落地玻璃有街景，環境好舒服。


天氣超熱，同Mr. No叫杯野飲飲下先。 

Cucumber,Mint,Lime Soda $48 (後)
Mr.No一見到呢三種材料就話要呢杯，因為感覺好消暑，味道方面青瓜味較濃，甜味無乜，比較清淡。

Strawberry, Grapefruit Juice $48 (前)
而我就叫左一杯感覺Fruity d既，但都係無咩甜品，西柚味酸酸地又帶d苦澀，士多啤梨味唔特出。

點完菜，先食d餐包，麵包唔暖，外皮比較硬，食唔食都無所謂。

Romaine Salad $86
用娃娃菜做西式沙律真係第一次見，而且娃娃菜有微燒過，Mix埋花生醬做既汁好特別，d菜都幾爽脆同甜，而且有風乾左既Parma ham薄脆，咸香味幾濃，再加埋溝左黑醋既藜麥，味道同口感都有唔同層次，而且賣相亂中有序，有藝術感，係個幾有心思既沙律。

Red Prawn $178
呢個意粉用左三款蝦煮成，分別有西班牙紅蝦，海蝦同櫻花蝦，真係蝦味十足，隻紅蝦夠哂大隻，肉質結實鮮甜，而櫻花蝦既份量都好多，增加咸鮮味，加埋好多洋蔥粒，乾蒜粒同少少辣椒，令個意粉有種泰式既味道，好惹味。

Market fish 時價
食完紅卜卜既蝦意粉，黎個青BB既石斑orzo(米型既pasta)，Orzo口感比一般米滑身，之所以綠色，係因為加左抺茶去煮，而碟上面既粉都係抺茶粉黎，不過我就唔太食到有好濃既抺茶味，反而似蔬菜汁，面頭既石斑肉質結實，但就無乜魚味，同個意粉相比，整體就比較清淡，一濃一淡都好，無咁Heavy。
整體食物方面都唔錯，材料配搭創新同有心思，賣相又夠靚，味道方面可以更加好，環境舒服，Relax，收工想靜靜地避開人群，黎呢度係個唔錯既選擇。

地址: 尖沙咀河內道18號K11購物藝術館1樓101B號舖
電話: 3586 1959

日式海鮮盛宴 - 焱丸水產

人大了，舊朋友愈來愈難約，成家立室既要陪老婆，陪小朋友，拍拖既要陪男神女神，工作狂既星期六、日照常返工，好唔容易約到半數人已經要Thanks God！馬上黎個快閃gathering，因為下一秒，你唔知邊個又要甩底。

有d餐廳只係岩一班人食，因為兩個人食力有限，試既款式唔夠多，一直係我gathering餐廳名單中既 焱丸水產，因為之前係東京旅行試過類似以水產為主打既居酒屋，水準高，氣氛好，之前知尖沙咀開了一間，已經好想試，今日終於可以一試。名為焱丸水產，當然就係主打水產，即海鮮，見到餐廳魚缸內新鮮既海鮮，未食都已經信心大增。


餐廳裝修隔局與東京那間有九成相似，天花掛有魚網，紙燈籠，牆身壁畫，日式海報，仿佛坐隨意門去了日本。




一行六人未到齊，天氣熱辣辣，快手叫杯凍飲降下溫。巨峰梳打，乳酸梳打都酸酸甜甜夠開胃。朋友中當然有酒鬼，點了一杯Cassie Vodka，其實即係Vodka coke的朋友。



人齊了，一番討論後，點了一堆食物，人多就係好辦事，叫了好多不同款式，相信今日都係捧腹而回，咁耐無見，飲飽食醉先盡慶ga ma！

麻醬番茄豆腐沙律 $58
蕃茄新鮮，香甜多汁，豆腐嫩滑，沙律菜爽口，加埋麻醬既香，好食。

海鮮沙律 $78
海鮮沙律面頭有一隻蝦肉，下面係刺身粒粒，都好豐富，有三文魚，帆立貝，吞拿，油甘，除帆立貝爭d之外，其他都好新鮮，加埋沙律汁撈均黎食，酸咪咪，好開胃。

左口魚刺身 $120
有朋友話未試過，一於試下，左口屬白身魚，魚味係偏淡，食既係爽口彈牙口感，

刺身5點盛 $250
再黎個人人喜愛既刺身5點，以呢個價錢，有齊海膽、三文魚、帆立貝、吞拿魚、油甘魚，而且每款都厚切，好足料，實在抵食，全部都非常新鮮，特別係海膽同帆立貝真係好鮮甜呀！

食完幾款冷盤，食返d炸物平衡一下。

雲丹海苔芋天婦羅 $80
雲丹即係海膽，海膽天婦羅一直都想試下，呢度係用紫菜包住少少飯同海膽一齊炸，粉漿夠薄身，但白飯將海膽既鮮味溝淡了，口感軟綿，未試過，一試無妨，但我覺得海膽都係刺身最好食吧！


炸牡蠣吉列 $80
另一道炸物，炸廣島蠔就不陌生，蠔屬中size，幾飽滿，外脆內軟，熱辣辣，蠔味鮮濃，一個人食四隻都唔夠呀！

焱丸味噌甲羅燒 $68/件
之後食既就係一早已上枱既招牌菜，浜燒水產系列既焱丸味噌甲羅燒，蟹蓋入面載有蟹膏，蟹籽，蟹肉同鵪鶉蛋，未食都知呢個combination無得輸，而且呢度每枱都有一個細燒爐，有專人會幫我地燒，就唔怕燒燶或者唔熟啦。



製成品登場！蟹膏咸鮮味超濃，蟹籽卜卜脆増加口感，加埋絲絲蟹肉既甜味，真係好正，雖然鵪鶉蛋已經失去蹤影，但相信係發揮了令整體質感更濃厚既作用。

焱丸活貝大盛 $368
再來一盤甲殼類，帆立貝，生蠔，鮑魚，大蜆，非常新鮮，鮑魚仲郁郁下ga！


先食帆立貝同大蜆，兩樣都鮮甜到不得了，蜆燒完不會嚴重縮水，帆立貝啖啖肉，裙邊位都唔會靭。

未燒前郁郁下既鮑魚，已經証明好新鮮，食海鮮就係食個鮮字，只要新鮮，唔洗多餘既調味，原汁原味就係最好，鮑魚微微海水味，口感軟糯帶點彈牙，真係非常高質。

生蠔燒後依然飽滿，蠔味，海水味濃，一點腥味都無，讚！

朋友鐘意食帆立貝，再來兩個，今次試下有調味既。
松葉蟹膏 同 和風木魚味 $75/件
本來就咁燒，食原味已經好好味，但有調味係錦上添花，每款都好似一道創作料理，味道配搭得宜，木魚香增加日式風味，蟹膏增加濃甜味道，兩款都各有千秋，好好味。




花魚一夜干 $160
食完浜燒水產系列，已經八成飽，飲酒既朋友叫了一條一夜干，都幾大條，有一隻半手掌咁長，侍應細心幫我地切開一件件，方便Share，外面燒得香脆，魚肉保持鮮嫩，又不會過咸，水準之作。


特上壽司盛合 $338
最後來一客壽司盛合，食返d飯，以澱粉質作結，吃了拖羅，三文魚子，牡丹蝦，拖羅魚油重，三文魚子鮮甜，牡丹蝦肉質爽，味甜，三樣都好新鮮，大滿足。


地址: 尖沙咀棉登徑23號華楓大廈地下5&6號舖
電話: 2654 8200 / 2651 9400 / 6962 1398
營業時間: 星期一至日: 12:00-15:00, 18:00-02:00