明太子粉絲必到 - 鱈卵屋

岩岩四月頭去完九州旅行，其中一站係福岡，福岡有好多當地特產，其中最出名既一定係明太子。係當地會見到好多賣明太子既專門店，同好多限定既零食，手信都會加入明太子。我同Mr.No都幾鐘意食ga，所以返香港之後就搵到銅鑼灣有間專門食明太子既餐廳，懷緬下，當自己仲係日本啦。

餐廳入面有捐款箱，為熊本地震籌款。

10pm後有任飲放題，$298可以有90分鐘任飲，估唔到呢間餐廳星期一至六係開到凌晨三點，鐘意食日本菜同飲返兩杯既你可以黎幫襯下！

餐廳地方唔算太大，裝修簡潔乾淨。



鐘意佢地每份既餐具隔離都會有一朵小櫻花。

炸薯條點明太子惹味汁 $48 
岩岩炸好熱辣辣既薯條雖然有d熱氣，但油溫控制得好，外脆內軟先係最好食，粗幼又岩岩好，點埋混合左明太子既沙律醬，好滋味，真係一條接一條，停唔到口。


明太鐵板芝吱雞 $68
上枱鐵板熱辣辣，吱吱聲響，雞肉粒上有薄薄一層芝士包住，芝士入面有少少明太子，明太子味唔太重，咸咸地加埋芝士味唔會好漏，雞肉都算嫩滑，除左雞肉仲有薯仔粒。

魷魚明醬 $38
除左明太子，仲有d味噌mix埋醃d魷魚，咸鮮味好濃，少少辣，送啤酒就岩哂，唔想咁濃味，可以配青瓜食中和下。

牛油果吞拿魚刺身辣味沙律 $94
我同Mr.No都好鐘意食牛油果，見到呢個沙律有，緊係要叫返個啦，雖然份量唔係太大，但都有好多牛油果粒同吞拿魚粒，兩樣都好新鮮，個醬辣辣地，好開胃，仲有好香既麻油味。

炸明太多春魚 ($55)
多春魚炸漿唔厚，炸漿內都有明太子，食落比一般炸多春魚咸香味更重，又係佐酒小食之選。

明太子上灌湯蛋卷 ($78)
係博多都食過明太子蛋卷，呢度既真係有日本食既水準，蛋卷夠厚有蛋香，而且仲好濕潤吸收哂上湯，加埋多到爆出黎既明太子，咸香味混埋蛋香，真係好好味，超推薦！


銀鱈魚特製西京味噌燒 $128
銀鱈魚又係我地既最愛，呢碟又係熱辣辣上枱，調味岩岩好，唔會太甜或太咸，而且魚肉好香好嫩滑，水準之作。

三文魚併油甘魚鱈卵碗 $138
最後食返個飯先，飯上面有三文魚粒，油甘魚粒同明太子，仲有d蛋絲，紫菜同竹旬粒。
呢個飯有三種食法:
(一) 就咁Mix埋所有材料食。 
(二)加鐘意既調味料Mix埋食，我就最鐘意佢有紫蘇葉，加左果陣獨特既香味，係飯粒中散發出黎，好香。
(三)加調味料加wasabi再倒入木魚湯變成茶漬飯，木魚湯加埋小小wasabi味係我最鐘意既食法。





呢度除左食野，仲有好多日本直送既明太子產品賣，而且價錢都唔太貴，等你返到屋企都可以品嚐到明太子既美味。



打Blog前做返d功課，原來鱈卵屋係福岡明太子名店「FUKUYA」係香港開設既餐廳，開設餐廳既目的，係想將明太子文化推廣到香港，希望更加多香港人會品嚐到明太子既料理，而且呢度既總經理都係日本人黎，保證每日都用由日本直送，最新鮮既明太子提供各式各樣既明太子創作料理。大家鐘意食明太子既朋友，以後黎呢度都可以食到福岡既風味，未試過食明太子既，不妨黎試下，可能一試就會愛上！

地址: 銅鑼灣軒尼詩道499號永光商業大廈14樓
電話: 2250 7117
營業時間: 
星期一至六: 18:00-03:00 
星期日: 18:00-00:00

海港葡餐 - Alma Portuguese Grill

為朋友慶生，朋友揀左兩間係海港城既餐廳，我之前都食過了，想試下新野，腦裡閃起了每次行去LCX都經過的葡國餐廳，新開左一排，上網見食評唔錯，問朋友有無興趣？朋友從來都係「順得人」，所以就訂枱啦，我仲可以順便到樓下的Lady M買生日蛋糕 :)

早來了影下環境，安排左對海既座位，對住維港，景緻開揚，果晚仲要係Leon第一晚開演唱會，侍應同我講笑會唔會望到Leon。

裝修以藍白，木色為主，簡約舒適！


餐碟好特別。


朋友黎左，侍應先奉上餐包，係去澳門食豬扒包果種麵包，微暖，外脆內軟。

炸馬介休薯球(5件) $68
食葡國菜必食啦，炸到金黃色，無炸漿咁滯，外脆內綿，唔油膩，調味都唔錯，唔會太咸，又食到馬介休既咸香味。

烤豬耳沙律 $80
話說係香港都好少食葡國餐，去澳門都係食過2-3次，印象中未食過烤豬耳沙律，應該係聽都未聽過，朋友話想試下，就叫一個，豬耳食鹵水就多，西式整法好新奇，呢個沙律用左好多香料，洋蔥絲mix埋，豬耳皮既部份比較多，唔算好多軟骨，所以口感唔係爽口反而軟綿綿，幾重香料味，少少酸，都幾特別。

葡式醃豬肉配薯蓉 $120
本來想點烤魚，但當日烤魚係沙甸，我麻麻地，於是叫左呢個試下，估唔到又唔錯，醃豬肉好似燒肉，但無咁鞋同埋咸，少少咸香，肉質都幾嫩，配埋唔係一Pat而係粗粒感既薯蓉，唔錯。

招待炭燒霹靂春雞 $98
睇食評好似個個都會叫一隻，而且$98又唔太貴，就叫隻試下，炭燒味濃，外皮燒到燶燶地，但雞肉唔鞋，幾嫩滑，點埋旁邊既醬汁，酸酸辣辣有d似泰式辣醬，都幾惹味。

葡國雞飯 $110
同平時食開既葡國雞飯唔同，唔會有好多葡汁，雞肉似雞肶肉，用葡汁，香葉，蕃茄一齊煮，幾入味，而且無一般葡汁飯咁漏。

總結，食物，環境，服務都唔錯，侍應好nice好風趣，坐得舒服，又有海景，如果成日食日本野，西餐多食到悶悶地，不妨黎試下。

地址: 尖沙咀廣東道17號海港城海運大廈3樓OT310號舖
電話: 3188 3668
營業時間: 星期一至日: 11:30-23:00

比利時之夜-FRITES Belgium on Tap

今年5.1係星期一，有個long weekend，星期5收工緊係要食返餐好既Happy下啦，之前行過希雲街見到有間好有feel既比利時餐廳，所以就約左幾個吃貨friend一齊試下啦，一入去覺得裝修好靚，樓底好高，好似真係去左外國既餐廳咁呀，帶d古典feel但四圍都係鏡面牆同好多啤酒既擺設又有點型格modern味。

半開放廚房。

好大既酒吧。

好多外國人係度Happy Hour，氣氛好熱鬧，因為呢度每日3-7pm都係HH時段，生啤，紅白酒同烈酒都有半價！

見大家飲得咁開心，我地都叫返杯飲下先。呢度既drink list有成10幾頁，而當中好多都係比利時入口既啤酒，我自己就唔係太好啤酒既，因為唔太鐘意隻苦澀味，不過都唔洗擔心，因為係眾多既啤酒中總有一款會岩你心水，比我搵到一隻酒精好低，只有2.5%，而且係fruity既啤酒，就試下你啦！

Lindemans Pecheresse $75
正如drink list介紹所講，Golden in color，顏色好金黃，聞落去好香桃味，入口蜜桃味散發出黎，酸甜味平衡，帶小小麥香味，有d似有氣蘋果汁，不過層次更豐富，酒精又唔高，岩哂女仔飲，飲多幾支都唔怕醉啦！

Hoegaarden Rosée Draught $70
Hoegaarden既啤酒大家應該飲得多，最近就出左一隻叫Rosée既新味，粉紅色，好靚，朋友話有少少Raspberry同花香味，甜甜地，只係3%酒精，啤酒味無咁重，幾好飲。

Arlevelda Grand Cru $75
另一個朋友叫左呢隻啤酒，酒精重少少，7.3%，麥芽味重，帶有焦糖，拖肥，朱古力既甘甜，焦香味。留意返呢度唔同既啤酒係會配返佢地同牌子既酒杯ga，相信無幾多間餐廳可以咁講究，有咁齊既啤酒同酒杯。

Crab Tian $120
Starter叫左個蟹餅，Mix左芹菜蛋黃醬，碎蠶豆，青瓜絲，香草，再用d 檸檬汁做dressing，雖然蟹肉都幾多，不過可能芹菜較濃味既關係，蓋左蟹肉既鮮味，不過整體都幾refresh。

可以配埋旁邊既薄多士食。

Salad De Mer $155
海鮮沙律，有一隻燒虎蝦，普通蝦肉，同埋魷魚，蝦肉都幾多，虎蝦幾鮮味，Menu寫個汁係passionfruit aioli，不過唔太食到熱情果味。

Mussel pots (Mariniere) 1/2KG $235
之後試下佢地既signature dish 青口鍋，有6種唔同既汁可以揀，我地揀左比較classic既Marinierea style，即係用白酒，芹菜，蒜頭同香草煮既汁。半kg份量都唔少，而且隻隻青口都有肉，好飽滿，個汁真係好好食，可能係用牛油煮? 有淡淡既奶油香，好多芹菜，洋蔥粒，口感豐富，青口既鮮味加埋呢個汁，好食到唔停口。

除左青口，旁邊有薯條配Mayo，薯條外脆內軟，熱辣辣，仲有麵包可以點汁食。

Flemish Short Rib Stew $295
呢個short rib係同洋蔥，蘋果，蘿蔔一齊slow cook，所以牛肉真係非常之淋同入味，個汁充滿牛肉既精華加埋蔬菜既甜味，好想要碗白飯撈哂d汁食，哈哈！


不過呢度係食比利時菜，所以就配左薯蓉，仲落左松露油，好香好幼滑。

750gram Roasted Pork Knuckle $245
份量相當有睇頭既咸豬手，上碟前已經切好哂，唔洗自己切得咁辛苦，皮焗到好香脆，唔肥膩。肉好嫩，啖啖肉，調味岩岩好，唔會太咸，配埋舖底燒過既蔬菜，平衡一下，感覺無咁guilty！食完豬手都已經好飽，不過朋友話想食d甜品，女人果然係有第二個胃，哈~ 


Baileys Creme Brulee $85
估唔到size都唔細，金黃色焦糖面，燒得好靚。

食到少少既Baileys味，焦糖面好脆，燉蛋好香好滑。

呢度絕對係Happy Hour或者一班朋友傾計食飯既好地方，氣氛熱鬧輕鬆，樓底高，空間大無局促感，食物美味，份量大，放工諗唔到去邊度放鬆下？一於黎呢度啦，不過暫時只有港島區有4間分店，聽店員講未來將會係九龍區及近郊地區開多十間分店，咁就方便我地一眾打工仔多個好地方食飯飲酒啦！

地址: 銅鑼灣希雲街38號曦巒地下1號舖
電話: 2142 5233/9828 2961
營業時間: 星期一至日: 11:45-00:00