餐廳唔算大，座位大概三十幾個，裝修走摩登型格路線，雲石枱，黑色餐紙，特色吊燈，木紋牆身，加上醒神黃色牆燈，坐位之間唔算太迫，樓底高，環境舒服。
望望餐牌，晚市主菜+$48就可以轉成套餐(有是日餐湯+沙律+非酒精$22飲品)，我地叫左兩個主菜轉餐同一個前菜。
先上餐湯同麵包，用木盤奉上，麵包配有牛油同蒜蓉醬，但麵包太硬，食左一塊就放棄。
餐湯係雜菜湯，好多雜菜粒，好足料，口感豐富，好飲。
再黎就係沙律，蔬菜好鮮，沙律汁略酸，不過好開胃，鐘意佢加左d黑橄欖，令個沙律無咁寡。
叫左杯Mocktail叫Summer Holiday，原本以為係橙橙黃黃好夏天果d色，點知係杯薄荷綠既Mint lime soda，唔知d Soda係咪擺左好耐，無咩氣，令成件事唔夠refresh。
法國藍青口 $118
法國藍青口細細隻，份量都唔少，個汁好香好Creamy，只不過d肉實在太細粒，無咩鮮味，浪費左個咁好味既汁，食完唔夠滿足。
冰島比目魚 $150
賣相好靚，比目魚魚皮上面係蒜香醬，上面仲有d白飯魚仔，但可惜應該脆既魚皮一d都唔脆，白飯魚仔同樣淋左，而且魚肉好油，我諗係煎既時候火侯控制得唔好，令本來多魚油既比目魚再索左煮食既油，搞到超油膩，同好漏，整體都幾失望，好睇唔好食。
草飼羊架 $198
擺碟賣相同樣好睇，羊架有三點五支份量都唔少，羊架上面淋上左開心果醬汁，呢種配搭都係第一次試，但無咩驚喜，可有可無，寧願點返薄荷醬。羊架幾淋身，但羊味偏淡，無咩肉香，整體認真麻麻。
總結，除左餐廳環境舒服，服務好殷勤之外，食物都係賣相勝於味道，離水準之作還有一段距離，後來知道呢間餐廳係由三位八十後男生所開，而且實行farm to table既概念，食材都係來自元朗既有機農場，而海鮮堅持使用有海洋管理委員會認證既持續海鮮入饌，為生態，本地農場出一分力，應大力支持，希望食物味道能改善，愈做愈好，Never too late！
地址:元朗青山公路元朗段1號珍珠樓地下7號舖
營業時間: 星期一至日: 12:00-16:00; 18:00-22:30
沒有留言:
張貼留言