Cenacolo Steak & Pasta

上星期六一早出左中環陪Mr.No覆診，佢早一晚已經講好左睇完醫生去呢度食個lunch，記得同Mr.No拍拖無耐，我仲係青春少艾果陣，當時飲食年資尚淺，從來未去過SOHO區食飯，果時心裡面有個諗法，就係好想食到一碟好正宗既意大利粉!!!! 究竟咩係正宗意大利粉呢? 就係唔係茶餐廳果D茄汁/黑椒汁配什扒意粉或者大叉樂既焗肉醬意，而係一碟個汁真係用新鮮茄蕃，橄欖油，香草煮出黎既意粉! 於是好似係拍拖兩週年既時候，我就係Openrice搵到呢間餐廳，滿足左當時呢個既小小願望，哈哈~而家諗返都覺得幾好笑! 就係果次食完之後我地開始多左黎呢區覓食，飲食層面開始擴闊左! 而呢間餐廳因為食物質素都唔錯，價錢又唔貴，性價比高，以前既情人節/聖誕/拍拖紀念日都有再幫襯，雖然附近都有好多質素比佢高既餐廳，但可能情意結既原因我地久唔久都會返黎食ga！

星期六12:00鬆d黎到，餐廳唔算多人，咁多年餐廳環境都無變過，地方唔大，枱與枱之間都比較近，不過走既係casual既路線，記得以前黎dinner，好多外國人吹水飲酒，嘈嘈地都幾有氣氛，唔會有拘束感，側邊有一排sofa位就坐得比較舒服!

Lunch menu，3-course lunch set只係$108，以中環區黎講實在太平了吧! 而且燒西冷係唔洗額外加錢ga！呢個價錢無加過價之餘好似仲平過以前食既？印象中記得以前好似都要$128？(謎)

我同Mr.No分別揀左Grilled sirloin同Savory pork chop做主菜，前菜就Smoke gammon ham salad同Caesar salad各一!

先黎既係麵包，呢度既麵包同第一次食一樣咁好食，微暖，外脆內軟，同少少濕潤，有D似蛋糕，麵包入面有香草同洋蔥，點意大利醋同橄欖油食，好味!


之後沙律就到，收$108仲有兩款沙律/或餐湯你揀，而且份量唔細，唔會細細碟得幾條菜，D菜新鮮，沙律有Gammon ham，又有烚蛋，呢d咪就係誠意!


食完沙律，主菜就上啦!
我既燒西冷配mushroom sauce，叫左medium，都做到中間粉紅色，切開少少血水，塊扒都唔算細，而且都幾厚身，肉質唔錯，唔會韌，好有炭燒味，雖然牛味唔算好濃，有少少筋，同埋好可惜果日廚師D鹽落重手，咸左少少，但以$108一個Lunch set黎講已經好過你去食X王之王好多啦! 同埋牛扒下面既薯蓉，同燒什菜都好好食ga，一個人食哂就係超飽! 呢個扒(有西冷/肉眼)基本上之前每次黎食都會叫，因為性價比太高，夜晚散叫都好似係$200左右。

之後就係Mr.No既豬扒，又係好大塊，仲大塊過我既西冷，墊底一樣有薯蓉同燒什菜，我試左少少塊豬扒好淋身，個汁係用甜梅煮，甜甜地同豬扒都幾夾，幾好食!

食完個主菜都已經飽到上心口，之後仲有甜品，甜品又係一D都唔Hea，Tiramisu配雲呢拿雪糕，Tiramisu比較濕潤，咖啡味同酒味唔會太重!

最後仲有餐飲無影啦!

總結呢間係一間有誠意，性價比高既餐廳，以如此相宜價格食到質素唔差既食物，加上我地對呢度既情意結，必會再黎幫襯，推介大家除左牛扒，呢度茄汁海鮮意粉都幾好食!

Address:中環蘇豪嘉咸街45-53號地下
Tel: 2525 2430
Open Hour: 星期一至日：10:00-23:00