今次呢間個位遠少少，太子地鐵站D出口行4分鐘左右，一路行條街好多車房，裝修材料，布行之類，仲比我撞到"我有一個夢想"既呀銀tim！佢仲keep到改做左果個look呀，哈哈！行下行下終於到，地方就唔係好大，兩張大圓枱加幾張細枱，入面就有個半開放廚房見到d姐姐係度包餃子。
食物種類唔多，主打餃子之外都有d麵類，餃子得三種味：雲耳椰菜肉餃，韮菜肉餃同埋白菜肉餃，可以揀煎餃/湯餃，同埋呢度既湯餃係用佢地既招牌野葛生魚豬骨湯ga，如果你食煎餃都可以就咁散叫碗湯黎飲既!
我自己就鐘意食煎餃多d既，所以叫左7隻煎雲耳椰菜肉餃 $33加杯豆漿$8！
豆漿先到，佢地寫自家製既，飲落都幾有豆味，又唔太甜，算係唔錯!
煎餃就等左陣先到，隻隻都煎到金黃色，每枱仲有樽豆豉辣菜圃比你配餃子食。因為我就唔係好食得辣，所以點少少試下先，一食落口就唔係好辣，因為有豆豉既關係，都幾香同惹味，菜圃細細粒好爽口，過多陣d辣味先會慢慢滲出黎！所以最後我都加左d紅醋中和下，有得揀我都係鐘意配豆瓣醬多d。 因為餃子即叫即煎既關係，熱辣辣最好擺陣先食，因為佢都煎得幾透下，以煎黎講，皮煎到太脆，感覺似半煎炸而唔係煎，所以都幾熱氣同埋略為油膩，入面既餡料就幾清淡，應該無乜調味，菜多過肉，食到椰菜同雲耳既爽口感！可能媽咪包既餃子實在太好食啦(我一次可以食成20隻)，所以呢度既餃子我只係用普通黎形容！
食哂成碟餃子之後我真係feel到個人好熱氣，定唔知因為d辣菜圃，我覺得喉嚨同牙肉好似係度發脹(無誇張XD)，因我好驚智慧齒牙肉會發炎，之前有排狂發炎真係令我生不如死，所以我就算飲左豆漿都再叫多碗野葛生魚湯($20/細碗)飲飲降下度火先，個湯完全無湯渣，飲落有幾鮮甜既魚湯味，飲得出無落味精，唔怪得之我見坐我隔離個妹妹明明食煎餃都成日畢佢媽咪湯餃d湯飲啦！
總結行開想食餃子，試下個湯底都唔錯既，如果想食煎餃，最好就兩個人黎食，一個叫煎餃一個叫湯餃中和下咁就好d!
Address: 太子大南街74號地舖
Tel: 2309 7308
Open hour:
星期一至六: 11:00-00:00
星期日休息
沒有留言:
張貼留言