隱身於小街中，附近都係車房，門面裝修頗平庸，唔識會以為係一間普通日本餐廳。
午餐分兩個時段，早輪12pm，次輪1:45pm。當日我地就訂左1:45pm，吧枱就full哂啦，所以坐order枱，坐order枱都好，可以多d時間影相 :P
坐低侍應就奉上熱茶同menu，茶夠熱，加分！日本餐廳一杯夠熱既茶真係好緊要。黎之前做左功課，已經決定要師傅發辦13貫壽司 $250 同午市師傅發辦 $450。
先黎既係沙律，除左沙律菜，入面仲有d白身魚、三文魚同鰻魚既肉碎，但魚肉碎有少少腥味，我認為沙律只要菜新鮮，簡易一d已經可以，因魚肉唔新鮮既話會令人覺得將用剩魚肉既頭頭尾尾擺埋落沙律? 畫蛇添足，不討好。
再黎就係茶碗蒸，內有冬菇，蟹柳，鳴門卷同帶子裙邊，都幾多料，但蛋較多水同味道偏淡，要改善。
再黎就係午市師傅發辦既第一味鮟鱇魚肝，質感似鵝肝軟綿綿，味道偏淡，底下既醋汁又唔夠酸，整體就係無乜味。
食完3個一般既前菜，主菜上場，先黎13貫壽司既頭10件(下至上，左至右: 鮮北寄貝，炙銀鱈魚，炙左口魚邊，紅衫魚，帆立貝，野生油甘魚，醋鯖魚，拖羅，赤身，池魚) 擺得好靚，而且每件魚肉既光澤，淨係睇都知新鮮，侍應有介紹每件壽司，叫我地先由味淡既魚開始，再食貝類，火炙，然後赤身，拖羅，最後就食最濃味既醋鯖魚。 每件壽司師傅已經有醬油同wasabi調味，就咁食就OK！
先食淡味既魚，池魚同野生油甘魚，其實呢兩款魚比起白身魚都唔算淡，兩件魚味都好濃，野生油甘比起一般既油甘魚味更濃郁，肉質更有口感。
日本紅衫魚，日文名叫「系撚鯛」，以後係日本餐廳見到，唔好以為係咩衰野呀，哈哈！紅衫魚刺身第一次食，擺入口咬左幾下，真係會有平時食蒸紅衫魚果陣味出左黎，之後鮮甜味慢慢滲出，好特別。
鮮北寄貝同帆立貝，一爽一柔軟，兩者同樣鮮甜。西京燒銀鱈魚就食得多，亦都係我既「飛佛」，但炙過半生熟既就未試過，魚肉幾爽口，不過味道就偏淡，都係食返西京燒啦！
拖羅肥美，無筋，魚油豐富、赤身魚鮮味濃。
10件壽司既質素都好高，好新鮮，而且每款都各有特色，值得一提碟邊既醃蒜頭好好食，完全無蒜頭既辛辣味，又爽又甜。
食完壽司再上刺身三點(午市發辦)，重覆有池魚同帆立貝，另外仲有半肥瘦拖羅。
無錯，拖羅都有半肥瘦，一半係粉紅，一半係紅色，將肥美油香既拖羅同魚味濃郁赤身集於一身，正呀，比個掂字師傅!
食完以上既野，已經好滿足，但唔好比佢停，再奉上壽司7貫(午市發辦)。竹蝦(右下) 肉質爽口有彈性，鮮甜。愛侶魚(左上) 聽到侍應小姐介紹果層仲以為聽錯，個名咁sweet，佢仲話無錯，愛侶，好似你地咁，哈！不過舊魚既味就唔太sweet啦，比較淡，肉質係爽又帶少少煙韌。
炙金目鯛(中上)微焦香加上金目鯛既魚油，好味。
富山縣白蝦壽司，係由好多隻小白蝦組成，口感軟糯，微黏，鮮甜但不及甜蝦。
和食係燒鰻魚，上面有幾片沙甸魚苗乾，咸香酥脆。
呢幾件燒鰻魚好好食，魚皮燒到脆身微焦，魚肉乾身但仍保持彈性，燒汁吸收於魚肉中，食多幾件都唔覺漏，香港食過既鰻魚中，呢幾件真係好高水準!
食完鰻魚仲有我地最愛既三文魚子同海膽!
三件軍艦既紫菜都好脆，海膽好鮮甜，好濃郁。而三文魚子超甜，甜到好似假既感覺，食完真係好幸福呀!
最後侍應小姐問我地要手卷定三色丼，我地揀左後者，因為可以share，估唔到咁三色丼又係海膽，三文魚子，仲有吞拿魚蓉，呢三個組合簡直係我食魚生丼既最愛。
三樣撈埋一齊食，鮮、香、甜、濃係口腔內爆發，大滿足！
食完刺身，壽司生冷野，飲返碗溫暖既赤麵豉湯，好舒服!
最後以柚子同士多啤梨雪芭作結，柚子酸酸甜甜好清香，士多啤梨有鮮士多啤梨甜味~
雖然前菜有少少失準，但主菜壽司，刺身，和食至甜品都非常有水準，價錢不貴，但交的不是行貨，壽司款式多，有驚喜，不收加一，但服務周到，經常加茶，收碟快，上菜時間拿捏得好，介紹亦相當細仔，以後渣15分鐘車就可以食到咁高質既壽司真係好開心呀，無理由唔再黎幫襯啦！
地址:元朗馬田路安寧大廈20-30B七號地舖
電話:2178 3163
營業時間: 星期一至日: 12:00-15:00; 18:00-23:00
沒有留言:
張貼留言