家庭式小餐館-醉江南

多數同Mr.No出旺角行街既話，都鐘意過太子食晚飯，因為旺角人多，較為好食既餐廳好多時都要等好耐位，但行遠少少去太子既話，就相對少人啦!今次黎左近旺角警局既一間上海菜館，之前同Mr.No都食過，價錢相宜味道都唔錯，所以今晚諗住再Encore，7點幾黎到，點知都要等位，不過等3張枱，都好快有位啦!

因為搭枱關係，無影到餐廳環境啦，廢事四圍影，令到同枱食客唔舒服啦！家庭式小餐館，地方唔算大，有6-7張枱，門外都有一張，裝修就比較舊，牆上貼左好多過左膠既食物相，但都尚算坐得舒服！

香煎餃子(5隻) $32
食上海野，多數食客都會叫小籠包，但今晚想食煎餃所以無叫到，呢度D餃子都係自家製，因為係有生餃買既，即煎即上，熱辣辣，一邊餃子皮煎到金黃香脆，唔油膩，涵係菜肉，唔係韮菜，餃子咬開好多湯汁，多到漏出黎，點埋鎮江醋同豆瓣醬食，好味呀！


咸肉津白 $68
上海咸肉味道同金華火腿相似，唯一唔同既地方，就係醃製過程的時間長短，而且金華火腿會加入酒來醃製，而鹹肉就無，所以鹹肉唔會有金華火腿果種獨突香味，但肉質就無金華火腿咁鞋，因為偏咸用黎煮清淡既津白就岩岩好，呢度既津白好腍好甜，吸收左咸肉既咸香味，切到細細棵容易食，讚！


黑醋魚塊 $88
本來Mr.No想叫鎮江排骨，不過我想食D魚，所以就轉左做呢個，黑醋汁同鎮江排骨既汁一樣，酸酸甜甜好開胃，魚塊雖然好滑，似新鮮魚，但肉太薄，炸漿偏厚，感覺食緊炸漿多過魚，下次都係叫返鎮江排骨比較穩陣。


上海菜飯$10
有餸緊係要叫碗飯，食上海野就緊係叫菜飯，呢度既菜飯無咩菜既香味，可能菜係後溝，唔係同飯一齊煮，所以依然保持翠綠，唔會煮到黃哂，菜既比例都幾多，食飯又食埋菜，健康！


小店家庭式營運，雖然比起集團式滬菜酒樓，呢度無華麗裝修，高級服務，但價格相宜，食物實而不華，有水準，一定會再黎幫襯。

Address: 太子西洋菜北街157A號地舖
Tel: 3690 2600