以前去過紅磡既景逸軒參加婚宴，果邊就有海景，呢度雖然無，但有落地大玻璃窗，感覺都幾開揚，同埋呢度樓底高d，流線形既水晶燈，銀白為主色裝修，光猛簡潔，感覺唔會娘。
坐低睇睇有咩食先，同事見到呢個套餐話幾抵食wor，每位$198就有4餸1燉湯1飯，仲要係魚翅撈飯呀! 不過因為有同事係唔食蝦同芒果，所以我地就無叫到啦。
足料老火湯 $138
先黎叫左個老火湯，係日本南瓜煲雞，同一般酒樓唔同，個湯係車仔推出黎，有個Gas爐細細火咁keep住d湯熱辣辣，飲湯最緊要夠熱，估唔到唔係咩名貴燉湯都有咁既服務，真係比個讚佢地呀！
講完服務，講返個湯，先上既係湯料，嘩！ 連湯料都擺到咁靚真係第一次見，平時d酒樓只係一堆咁畢哂落隻碟就算，所以又要再比多個讚佢地! 雞肉因為煲湯既關係就唔會好滑，不過見到咁多雞肉都諗到啖湯會好甜，而日本南瓜就好好味，唔會一夾落去就爛哂，仲有少少爽口，好甜，南瓜對身體好呀，食多幾舊，感覺好健康。
由細到大媽媽都日日煮飯咁滯，所以好幸福地餐餐都有湯飲，飲湯無數，所以已經訓練成湯精，呢啖湯好甜，而且飲到係原材料既味道，一飲就知無味精，而且細細煲都分到每人兩碗共八碗，真係好滿足！
脆皮素鵝 $48
有同事好鐘意食，就叫左個食下，入面都好足料，木耳，甘筍，芹菜，冬菇，外面層腐皮都炸得好脆，但一d都唔油膩，唔錯。
羊肚菌百合鮮准山 $98
因為我地幾個女仔都想食多d蔬菜，而我就好鐘意食鮮淮山，因為淮山好健康，有健脾益肺既功效，香港天氣潮濕，要去濕先要健脾，所以大家平時不妨食多D，鮮淮山好爽口，蜜糖豆好爽甜，百合夠新鮮，幾樣清淡既食食材夾埋吸味既羊肚菌食味道岩岩好。
濃湯桃膠浸菜心 $88
同事一見到呢味菜就話要叫，因為佢未食過桃膠wor，桃膠呢排好Hit，桃膠係桃樹既分泌，天然既植物膠原，有美容功效，講真我都係第一次見到酒樓有得食，我自己就買過黎煲糖水，桃膠本身都係無咩味，配合浸濃湯既煮法真係好適合，呢味菜簡單得黎又見創新，同時集健康美容於一身，女仕們一定要食啦。
鮮果拔絲黑豚肉 $88
介紹完幾個素菜，叫返D肉食下先，先講個擺碟就夠哂靚啦，有蜜桃同士多啤梨片圍住，有肉又有生果食，成件事好平衡。再講個肉，拔絲呢樣野多數係用係甜品上面，估唔到食黑豚肉都可以拔絲咁得意，而且唔係得個樣，好多時出去食咕嚕肉之類既菜式d炸漿會厚過舊肉，但呢度既炸漿好薄，D汁又岩岩好包住每件肉，唔會好油膩，而且黑豚肉真係寧舍唔同，舊肉淋中帶爽，好似食緊一件厚切既豬頸肉咁，最重要係完全無骨，啖啖肉，真係食得出咩叫水準，呢碟更加係水準之上啦！
圍村蒸滑雞 $88
雖然有荷葉墊底，但D雞無咩荷香味，不過雞肉就有好香既臘腸味，雞肉都幾滑，都幾多肉，唔會骨多過肉，有金針木耳一齊蒸，木耳吸哂D雞汁，唔錯！
蟲草花野菌蒸比目魚 $128
好少食蒸比目魚，估唔到又幾好食wor，魚好滑又無骨，又充滿魚油，一D都唔腥，怕食魚既朋友都可以試下，保證你鐘意，魚扒下面有好多野菌，木耳，蟲草花，紅棗，夾埋一齊食，感覺好滋補!
杞子桂花糕 $25
主菜食哂，叫左兩款甜品share食，我本身就麻麻地桂花糕，只係試左少少，桂花味好濃，唔算好甜，用隻心心碟上又幾別緻。
原個椰皇燉鮮奶 $28
呢個因為即叫即蒸，等左25分鐘到，一黎到就勁香椰青味，鮮奶濃埋椰青水一齊燉，又滑又好味。
總結，呢度D野食既質素好好，價錢合理，環境又好，坐得舒服，侍應們既服務又好周到，周不時都會黎斟水，又提我地小心野食熱，真係有賓至如歸既感覺，絕對係一班人黎gathering或者家庭聚餐既好地方，推介！
地址:尖沙咀天文台道8號5樓全層
電話:2736 8800
營業時間: 星期一至日: 11:00-00:00
沒有留言:
張貼留言