平價高質壽司-喜代村 すしざんまい

四月頭去左九州旅行，點都諗唔到返黎一星期熊本及南阿蘇就發生大地震，幾個我同Mr.No都有去既地方都有嚴重既破壞，心想好彩我地早一星期去，如果渣渣下車地震真係好危險，但同樣覺得好唔開心，因為一星期前仲安全美麗既地方，而家因地震變成頹垣敗瓦，天災無常，希望熊本及阿蘇既居民盡快可回復正常既生活，加油!!!

唔開心既事唔講啦，講一講九州為我地帶來美好既飲飲食食回憶。第一日我地先到福岡，原定晚餐食「華味鳥」，但因為臨時加插左夜櫻行程，於是改為快食，咁岩行過呢間壽司店 - つきじ喜代村 すしざんまい，門外有餐牌，見到大卜口只係298yen一件，就試試啦!


呢度有吧枱同餐枱可以坐，反正我地唔識日文，唔識同師傅溝通，所以餐枱算。一坐低侍應會問你飲咩drink，因為呢度唔包茶ga，我地叫左綠茶，好似係50yen。

餐牌有散叫壽司/細卷/手卷/刺身/壽司併盤/魚生丼(自行填order紙)，有相有no.對返，所以唔識日文都無問題，另外亦有一品料理同廚師是日精選。

我地係廚師精選餐牌點左個刺身併盤 - 有金目鯛，赤身，太刀魚，甜蝦，魚種唔係我地特別鐘意食，但都好新鮮，但略為薄切，不過呢個併盤只係 1500yen，即$100港紙鬆d，都抵食啦，香港$100食唔到有金目鯛既刺身併盤了~

上穴子 398Yen，好長呀，微微炙過，少少焦香，汁不多但夠味，無鰻魚咁漏，好食~


另外叫了一堆壽司，叫左一D鐘意食同埋未試過款，海膽398yen，赤貝298yen，數之子198yen，漬鰣魚98yen，魷魚68yen，帆立貝148yen，大卜口 298yen，炙大卜口 298yen。當中都有一d伏，漬鰣魚(右上)呢款好難食，好酸又腥腥地，同埋好出奇魷魚都唔好食，因為係日本食魷魚都好食過香港好多，係爽脆一咬就斷，再慢慢細嚼就係軟糯口感，但呢度竟然同香港果D一樣好似香口膠咁，o趙唔開囉! 不過68yen (HKD$5)件就算啦，haha! 其他帆立貝，海膽，赤貝都新鮮好食~


講到最好食一定係大卜口啦~真係又平又好食，食到滿口魚油香之餘，仲食到甜味，298yen一件真係太滾動，而家一路打一路後悔食得咁少，因為果日呢餐只係打算醫下肚，諗住賞完夜櫻再食其他野，但睇完夜櫻已經身心疲累。。。唯有下次去日本再瘋狂食過! 呢間壽司店其實日本好多地區都有分店，共有50間，而本店就係東京築地，大家下次去日本想食下又平又正既壽司可以試下呢間!

Website: http://www.kiyomura.co.jp/
福岡中洲店位置及營業時間: http://www.kiyomura.co.jp/shops/detail/46