餐廳有兩層，地下係半開放廚房加吧枱，可以睇到廚師係度燒雞肉，果日地下full左，我地被安排上二樓，有4-5張餐枱，地方細細，裝修係平實日式風格。
(photo from とりまぶし facebook)
午餐主要係食呢兩款，水炊き餐 1700yen 同埋燒雞飯餐(分3種分量)，Mr. No要左"上" 1450yen。
等左一陣，店員就奉上食物，先介紹我既水炊き餐有漬物，調味料，雞肉鍋，清雞湯，柚子醋同白飯。先試一啖雞鍋入面既湯，以雞骨熬成，質感微稠，但唔黏膩，相信係無落鹽及調味，好純粹既雞湯，味道單純但感覺充滿雞既精華!
雞鍋入面除左雞肉，仲有豆腐，冬菇，水菜同椰菜。
再黎就試試雞肉，鍋仔細細但至少有5件雞肉，全部用上雞肶肉，而且每件size都唔細，沾上柚子醋，柚子醋既清香，微酸配起雞肉真係相得益彰，帶起雞肉既鮮甜味，肉質非常好，肉嫩而充滿彈性，雞皮略厚但唔油膩，平時唔太食雞皮既我都將d雞皮食哂，因為覺得唔食係對唔住隻雞! 咁高質既雞肉，用簡單既煮法就最能夠食到雞既原汁原味。唔係講笑，此雞已立即榮升做我食過最好食既雞，無論肉質同味道都滿分，每一啖都覺得扎實滿足!
跟住係Mr.No既燒雞丼套餐，應該係呢間店既「味自慢」，燒雞既煮法係啟發於燒鰻魚。套餐同樣有漬物，調味料同雞湯，另外仲有一隻溫泉蛋。
店員話我地知，呢個飯係有四種食法，1) 係就咁食，2)加入自己鐘意既調味料，3)加入溫泉蛋，4)加上雞湯
Mr.No先試試原味，丼上面既雞肉同雞皮係分開，雞皮燒到無哂脂肪，好酥脆，雞肉充滿炭燒香，而肉質保持juicy，一d都唔鞋，加上充滿醬油香既日本米，好好食呀!
第2個食法，就係可以隨自己口味加入不同既調味料，總共有七種：鹽、一味(純辣椒粉)、山椒、七味、芝麻、黑胡椒同紅辣椒柚子。
因為Mr. No唔食辣既，所以佢只加入芝麻同少少黑椒，佢話其實原味都好夠味，加入呢d調味料只係增加少少調味料本身既香味，或者鐘意食辣既朋友加入唔同辣粉會惹味d啦~
第3種食法加入溫泉蛋，當溫泉蛋同充滿醬油既飯混合，再加上炭燒雞皮雞肉既肉香，濃厚香甜既味道集為一體，真係無得輸呀~！
最後，第4式，加上雞骨濃湯，再係上面加上少少蔥花同wasabi同食，就好似茶漬飯既食法，美味既飯加上充滿雞精華既濃湯，完滿。
有時旅行原本定左既行程，好多時因種種因素而有所改變，而改變令我地遇到唔到既人同事，都係一種緣份，一次經歷，鐘意日本既原因有好多，食物，風境，購物，仲有就係當地人既修養，態度，下圖既店員就算英文唔好亦盡力為我地講解燒雞丼既食法，其實menu上面有圖，但佢都堅持講哂4種食法，我地埋單之後，佢又跟左出黎話幫我地影相。加埋只係港紙二百幾蚊既午餐，但都堅持比客人最好既服務，佢地對工作既熱誠，係我地好值得學習，所以希望黎緊可以去多d日本，繼續向佢地多多學習啦! Mr.No, 認同嗎? 哈哈哈~
Facebook: https://www.facebook.com/torimabushi
沒有留言:
張貼留言